Apatani Baptist Women's Department

Apatani Baptist Association ho anii atañ hii toro japa du. Siika anii atañ ka Pinii paka ingo miigo miibinii atañ mi khiika jalo khiiko lakiñ ma. Mohlu biko keko hotiire ano toro japa bido ho miigo lugo miiko hotiire toro japa miido ludo. Siika anii atañ mi kalyañ kada giinii pa Apatani Baptist Association Women Department si doliñ la lyitii. Siika dotu paka doliñnii hii 4th September 2000 ho Atah Tage Yassung kapyo ja Chairperson pa ho Evan Tallo Madu Secretary pa dagiila dori tii.  Simi lotu ho Apatani Baptist Women Fellowship (ABWF) hala armyañ tii. Ho kami ho ABWD hala armyañ tiiku.

Anii atañ ka lyitu japa Kristan lyiri niisi anyañ 1993 hokii kapa do. Hiimi kapyo ya ho ngunu Ziro ganda hokii Tanii anii akha mih kone hetere nyima tiipe hala hendo. Ngunu Tanii lemba hokii lyitu japa Kristan lyinii anii atañ hii Hari lemba hokii lyitii pa kado. Hiika anii atañ hii Ateh Gyati Tatung ka agiñ ho ahbola ahtii. Hiika atañ hii Lt. Gyati Sai, Lt. Hage Yallung, Lt. Hage Yassing, Atah Gyati Santii, Lt. Atah Hage Yadii, Lt. Hage Opi, Lt. Hage Mado, Atah Gyati Yaje, Atah Dusu Puming, Atah Hage Mado, Atah Tasso Biine luka atañ.

Ngoya khiibe lemba hoka ahnii mohluka agiñ hoka baptisma lahiñ monii atañ hii Atah Michi  Tamang Yasing, Atah Kalung Elyu, Atah Nada Yadii, Lt. Nada Bath Yanya ho Atah Nada Yalyo luka atañ hii latii. Hiika haba pa baptisma lanii, hemper toro pa anii atañ mi arlḛ pa Pinii ingo miigo mika ingii miigiinii laka danii atañ hii Atah Dulley Otung, Atah Koj Hassang Yaming, Atah Hage Kaming, Lt. Hage Mumpa, Lt. Koj Hinda Yaja, Atah Mom Yapi, Atah Hage Yaniya, Lt. Kejang Pema, Atah Nada Yassing, Atah Nada Yaming, Atah Hage Yassing, Atah Koj Guro Yaming, Lt. Chiging Biine, Atah Michi Yallung,  Lt. Nada GyaboYassing, Lt. Nada Tabing Yassing, Atah Tasso Yadii, Atah Tage Yabyang, Lt. Habung Soli, Lt. Hage Yabyang, Atah Radhe Yalyo, Lt. Nada Tatung Yaniya, Atah Michi Yaring, Atah Hage Tade Yayo luka atañ hii datii.

Siika haba pa ngunu Tanii ganda ka lemba atañ hokii abuje anii atañ arila lyiku. Ho mohlu Pinii ingo miigo mi ano uro pa illa miila danya da. Siisi Apatani Baptist Association Women Department mi Evan Bamin Oniya Chairperson pa ho Evan Tallo Madu Secretary pa sangiila du.

Share