Grace Baptist Gyoliñkoniiñ

Grace Baptist Gyoliñkoniiñ, Old Ziro si ngunu Tanii ganda hoka anyeniipa ka Baptist Gyoliñkoniiñ donii pa lyido. Siika dorinii hii 1996 ho dori tii ho hiika myodu ho Hari, Bulla, Hija, Dutta, Mudang Tage la Bamin Michi miilañru lemba hokii Grace Baptist Gyoliñkoniiñ ho illa done. Sisi so lemba ponye hiisu insu dokunii niimpalukoda sokii Hari, Bulla, Bamiñ Michi la Mudang Tage luka atañ kii mohluka lemba ho gyoliñkoniiñ donya doku. So Grace Baptist Gyoliñkoniiñ ka piigo mi atiih biilyi ke hiimi kaka nyato ho labii nyange.

Dorinii:

GBC si hii lotu ho mihka kiidi ho miilya tola done. Hiimi anyañ hoka amu liniiñ arie mi helii biidola tiicko lango he bibii dola anyañ lange pa bara pa lalya tola dotii. Hiimi miyu abuje tappo lama pa lyine hojalo Ateh Michi Tamang la Rev. Tage Donyi luka atañ ano uro lukko giila lyiko hopa siika gyoliñkoniiñ ude mi ano aya pa miipe chala miitii.

Ho kami ho simi riila riiku kiile ano chimiñ pa dori kula lyiku. Ho sisi jalo pa ano aya pa Pinii lyanko hopa  himme akha ho nyimuñ yapa atañ toro japa ahkuñ siila Pinii mi asañ ko gyoliñkoniiñ ude  pa lyila do.

Liidiraniiñ la Tiiliinii:

Grace Baptist Gyoliñkoniiñ si Papii ho do. Simi ngunu tudii pa GBC (Grace Baptist Church) hala ludu. Tanii aguñ pa ludo kuko da GBG (Grace Baptist Gyoliñkoniiñ) hala lula kendo. Siika simi ka liidi raniiñ mi  2nd September 1995 ho Rev.Dr. K. Lalrinthanga rabi tii. Simi Pinii ko tiilii bila Rev. Dr. C. L. Rema, 7th September 1996 ho miitii.

Kapyo Japa Ingii-Miigiinii Atañ:

Siika gyoliñkoniiñ so anyañ nyange mi Mr. Michi Ommo Secretary pa, Mr. Dani Tadu Youth Secretary pa ho Mrs. Rubu Apu Women Secretary pa sangii la mi khiibe committee nyima pa lyitii. Hiika haba pa Mr. Nada Yapa kapyo japa Chairman pa dugii kula ho Mr. Dani Tadu Secretary pa dugii kula ho khiibe committee dubo kula lyiku.

GBC_1.jpg