Sunday School Department

Sunday School mi miitu japa 16th October 1994 ho Dr. Changthanpari miiri giila miitii. Mo Sunday school hoka puri giinii pa hala miyu kahe la, ho Sunday school hoka puri giisanii mi pota pa keliñ keha bila miitii. Mohka keliñnii atañ mi lakuñ lapa lala la Tanii aguñ pa Miss Yachang Ampi Tanii aguñ pa kesi bila miitii. Hiika kesi biniiñ atañ mi kelyañ kedala Pastor Tallo Apa, Mr. Dani Tadu la ho Evan Mudang Oje luka atañ miitii. Ho hiimi Mr. Lalthanawma, 2003 ho Mr. Dani Tadu ka Sunday school Secretary paka dalyi myodu ho Sunday school kheta pa doku pa miiliñla volume yango he dopa miigii tii ho hiika kheta mi “ Sango ka Puyu” hala armyañla miitii. Hiika kheta mi release miibila Mr. HS Hminga miitii TBC ho. Hiimi sisi hiira pa miilyañ miida kula la 2014 ho Evan Radhe Ampa, Sunday school ka Director pa dala ano kapyo dopa miiliñ giila miitii ku.

Apatani Baptist Association hoka Sunday school dorinii mi aya kaka ko ho Dr. Changthanpari ka ahma rampa, L.Z. Sailo la Akala Ao lu miika miira giila dotii. Hojalo hiika myodu ho ano aya loda pa doder mapa dotii. Sisi kaka kuko ho Sunday School si ano aya miila lula do. Bilo puri giinii nanii kheta pa nyima pa doto ho siilo kaka kuko ho kheta takhe doku. Hiimi langela khiihe sari-medam atan puri giila alyañ hela anye gyoliñkoniiñ ho dala jarnyi hela alayañ hela kone Sunday school purinii atañ mi puri giila donya do. Mohlu Sunday School Director lo miigii kola anyañ anyañ ho ahkuñ siila Sunday School Gathering, Drawing Competition, Inter Church Sunday School Competition, Baptist Kids Competition atañ mi miidu. Hiika haho Vacation Bible Schoo (VBS)/Children Bible School (CBS) mi gyoliñkoniiñ atañ ho miiri miiri biila miidu.

Sisi jalo pa Evan Radhe Ampa ka al\r pa miigii lugii kopa Sunday School kheta atañ mi ngoya khiibe aguñ hokii Tanii aguñ pa miiliñla do.