Apatani Baptist Association ho nyimuñ yapa atañ hii huhañ allo pa lyido. Piijo daja lopa Apatani Baptist Association mika sangii sanii atañ hii siika sancha tulu atañ sii. Simi ka kage giinii pa hala Apatani Baptist Association Youth Department si doliñ la lyitii. Simi ngunu tudii pa ABAYD hala armyañ du. Siika dotu japa doliñnii hii 16th October 1996 ho Pastor Tallo Apa mi kapyo ja Secretary pa ho Evan Michi Tari mi Assistant Secretary pa kahe bila 4th Apatani Baptist Christian Fellowship ka dukuñ siiko miitii. Hiika myodu ho simi Apatani Baptist Youth Fellowship (ABYF) hala armyañ tii. Ho hiira simi Apatani Baptist Central Youth Fellowship (ABCYF) hala armyañ la miika tii. Ho kamikalo ho ABAYD hala armyañ ku.
Ngunu Tanii nyimuñ-yapa atañ ka santu paka Jisu limbo hoka sari niisi 8th November 1992 ho kapyo japa, Rev. Tage Donyi, Ateh Michi Ommo, Ateh P.R. Lama la Atah Hage Rina luka atañ hii Ziro ganda ho kapyo japa baptisma lari biila sari giitii. Simi kapyo yapa tiire nyimuñ yapa tonge danya siitii, hojalo hiika atañ hii aggo hokii ahnii adiñ tola mohlu aya indḛr impḛr mapa danya tii. Hiika ho Imti Ao, Akala Ao, Depak Sahu, Mr. Senteg, Mr. Mama, Mr. Kuka, Miss Nutea, Miss Patea la Rempui Sailo luka atañ hii datii. Simi ka akha ya tonge danii hii Lt. Dr. Taw Gumsi, Lt. Dr. Takhe Budung la Dr. Bengia Mala luka atañ hii datii.
Ho ronyiniipa ka Ziro ganda hoka 23rd may 1993 hoka baptisma bilyi ho miyu alyañ hela yango hemi Missionary N. Sema Siiro kiiley ho bila miitii. Siika arpu hokii alyañ hela hinge hii Tanii miyu tii ho hokii alayñ he hii nyimuñ yapa adiñ tii. Hiika ho Evan Michi Tari, Pastor Tallo Apa, Evan Hage (Bamin) Oniya, Evan Dusu (Tallo) Madu la Atah Hage (Nako) Yaming luka atañ hii baptisma latii.
ABAYD Report 2012 mi kako ho 1993 ho nyikhañ hela yango he nyimuñ yapa atañ hokii datii. Ho sisi ngunu Apatani Baptist Association ho lango hela alyañ khiihe la piilye nyimuñ yapa atañ hii da. Sokii tange hii Pinii pa atoh mi hempa siibi kula Fulltime Workers pa da, ho tange hii lyosa lyosa piigo rago ho biinii milo sala dala, Pinii pa imbi miibi nyado.
Sisi Apatani Baptist Association Youth Department mi Ateh Nending Ommo President pa ho Ateh Dani Tadu Secretary pa sangiila da.
