Bethel Baptist Gyoliñkoniiñ, Maniipolyañ si Ziro ganda hoka piilyenii Baptist Gyoliñkoniiñ donii pa lyido. Siika gyoliñkoniiñ si Maniipolyañ la Siiro hoka miyu dunii atañ ka Pinii mika herii henkuñ kopa lyido. So ngunu Tanii ganda hoka lemba poroja Hong lemba hokii malañya hii ahla lyido. BBC ka piigo rago sokii la kapa lakiñ doke hopa miilañru so ahla kaka nyato ho niika anna nii hokii kapa lyimilo labii lakiñ doke.
Dorinii:
BBC ka kiidi mi Ateh Tallo Kojing miilya dopa bilya la mii. Ho hiiko OB type gyoliñkoniiñ ude pa pellya la miitii. Siika simi Rev. Dr. K. Lalrinthnag, Pastor Tage Atoh luka atañ hii ami abañ pa dagii la miigii tii. Mohluka agiñ ho Ateh Tallo Kojing, Ateh Hibu Dogu, Ateh Punyo Genda, Ateh Biim Tara, Atah Tallo Yaring (Dusu Yaring), Atah Takhe Yalu, Atah Tiilying Assang, Punyo Mai, Hibu Riicho, Hibu Riido luka atang ho abuje hime-akha dabo la lyitii.
Liidiraniiñ la Tiiliinii:
Ho siika simi 26th February 1999 ho Rev. Dr. K. Lalrinthnag, Pinii ko tiilii bila miitii.
Kapyo Japa Ingii-Miigiinii Atañ:
Siika gyoliñkoniiñ ho kapyo japa ka Secretary sangiibo hii Tallo Yaring (Dusu Yaring) ho kapyo japa Chairman sangii bo hii Ateh Tallo Kojing. Ho kapyo japa ka Pastor dagii bo hii Pastor Tage Gute.
Ronyiniipa ka Miikunii:
Hiika haba pa anyañ nyango he dala kula Ateh Tallo Kojing kokii kiidi mi tiicko jar hinkhañhe bila la riiku. Ho hiimi puti kula SPT type pero ude pa pula miitii ku. Simi ka miilyi ho BBC anii atañ hii kiile hokii yalañ bacha giila ano uro pa miiri giitii. Simi arih laka miilyi aroh ho Shiinekunii Pastor Tage Ato, Ateh Takhe Pussang, Ateh Michi Tamang, Pastor Tage Gute ho Rev. Tage Donyi luka atañ arih bila miiri giitii.
Ho hiimi miija kula la 12th February 2004 ho Rev. Dr. Ronal Larson, Vice President Baptist General Council of America mo Pinii ko tiilii bila miitii ku.
