Town Baptist Gyoliñkoniiñ, Hapoli si ngunu Tanii ganda hoka dopyo japa ka Baptist Gyoliñkoniiñ donii pa lyido. Siika so ngunu Town Baptist Gyoliñkoniiñ ka piigo mi keko tola atii biilyi ke, kiirañ kaka hala ahto ho niika anna nii hokii kapa lyi ho labii lakiñ doke.
ZBC ka Dorinii:
ZBC (Ziro Baptist Church) mi miitu japa 24th Dec 1984 ho yamyo ude hokii puto la dotii. Hiika myodu ho Mr. Bendang Ao, la Dr. Bamin Tada luka atañ hii ingii miigii la datii. Mohlumi imbonii atañ hii Mr. Neelam Taram, Mr. Toko Kach, Mr. Rempui Sailo ka aba ho mohluka uru atañ la ho C. Rohluta (Circle Officer) luka uru atañ hii imbo miibo la datii.
Dr. Tao Gumsi, Dr. Takhe Budung, Dr. Bengia mala luka atañ hii hiika myodu ho Govt Higher Secondary School Ziro ho purila youth pa dala ZBC mi dekiñ hokii tasi pa pata liila miiko ho miibo la datii.
Hiika haba pa Mr. L.Z. Sailo mo missionary masu hojalo missionary ka miigo mi ano uro miila ZBC mi sangii gyagii la datii. Mohka agiñ ho Imti Ao, Akala (Rebecca) Ao luka atañ hii dabo tii.
Armyañ Myangu Kuniiñ:
Ziro hoka kapyo japa Conference miilyi anyañ 23rd October 1993 ho Mr. Neelam Taram, Home Minister pa dula sisi ka TBC mi siirañ tuli diho bila miitii.
Ho hiika haba pa Rev. Dr. K. Lalrinthanga mo missionary pa ahbii la siika yamyo ude mi RCC ude pa miiri giila miitii. Mohka haro paka miigii kopa ho Local Pastor Tage Ato chikañ hii Construction Secretary pa dagii laka ho ngunu Tanii ami-abañ ho anu-barmii atañ ka hembo kopa ano aya pa siika gyoliñkoniiñ ude miipe chatii. Ho hiimi Town Baptist Church hala armyañ tiiku.
Rev. K.T. Chungnunga 1st September 2000 ho siika gyoliñkoniiñ ude mi miiko biku la ho Pinii ko tiilii bila miitii.
Kapyo Japa Ingii-Miigii Atañ:
Siika gyoliñkoniiñ hoka kapyo japa ka Secretary sangiibo hii Mr. L. Z. Sailo, Chairman hii Mr. Bendang Ao ho Missionary dagii bo hii K. Lalrinthanga, mohka mihi C. Pari la Mr. Lalthanawma yapa atu pa ahla First Music Teacher pa datii.
